Европын Урлагийн Их Сургуулиудын холбоо буюу ELIA-гийн Азийн орнуудын төлөөлөн Удирдах зөвлөлийн гишүүнээр Монгол Улсын СУИС-ийн Д.Амгалангийн нэрэмжит ДДУС-ийн захирал Д.Уранчимэг сонгогдсон тухай таатай мэдээллийг та бүхэндээ хүргэж байна. Анх 1990 онд байгуулагдсан Европын Урлагийн Их Сургуулиудын холбоо нь өдгөө 47 орны 350 урлагийн их сургуулиуд, 300.000 гаруй оюутнуудын төлөөллийг сүлжээндээ нэгтгээд байна.
ELIA-гийн сүлжээнд Азийн орнуудаас БНХАУ, БНСУ, БНЭУ, Катар Улс, Сингапур Улс, Малайз Улс, Израйл Улс Тайвань, Монгол Улсын Урлагийн их сургуулиуд гишүүнчлэлтэй байдаг билээ. СУИС нь 2013 онд ELIA-гийн гишүүн байгууллага болж байсан бөгөөд СУИС-ийн захирал Э.Сонинтогос 2014-2018 онд тус бүр 2 жилээр 2 удаа тус удирдах зөвлөлд европын бус орон номинацид сонгогдон ажиллаж байжээ. Харин энэ удаагийн хурлаар шинээр батлагдсан журмын дагуу Д.Уранчимэг маань 4 жил удирдах зөвлөлд ажиллахаар болжээ.
ELIA-гийн шинэ өрөнхийлөгчөөр Австрийн Дүрслэх Урлагийн Академийн дэд захирал Андреа Врэйд сонгогдсон бөгөөд хурлын үеэр манай төлөөлөгчид шинэхэн ерөнхийлөгчтэй ажил хэргийн уулзалт хийж, 2020 онд ELIA-гийн “Teachers Academy” болон бусад үйл ажиллагааг Монголд зохион байгуулж болох талаар санал солилцож цаашдаа тус сүлжээнд СУИС ERASMUS хөтөлбөр хэрэгжүүлэх асуудлаар зөвшилцжээ.
