Монгол Улсын Засгийн газрын 07 дугаар сарын 16-ны өдрийн хуралдаанаар дэд сайд нарыг томиллоо. Тэрээр томилогдсон дэд сайд нарын олонх нь салбарын, салбартаа танигдсан мэргэжлийн хүмүүс байлаа. Тэгвэл Соёлын Дэд сайдаар Мөнхөөгийн Батбаяр томилогджээ.
М.Батбаяр нь 1975 онд Хэнтий аймгийн Баян-Овоо суманд төрсөн. 1993 онд нийслэлийн Баянгол дүүргийн 13 дугаар дунд сургууль, 1999 онд Техникийн их сургуулийн Барилга, инженерийн сургууль, 2015 онд Швейцарийн Технологийн их сургууль, 2019 онд Шинжлэх ухаан, технологийн их сургуулийн Барилга, архитекторын сургуулийг тус тус суралцаж төгссөн.
Архитектор мэргэжилтэй, хот төлөвлөлтийн архитекторын магистр зэрэгтэй тэрээр 1999-2000 онд “Диз-Арч” ХХК-д архитектор, 2000-2009 онд “Идеал групп” ХХК-д архитектор, гүйцэтгэх захирал, 2009-2010 онд нийслэлийн Барилга, хот байгуулалт, төлөвлөлтийн газарт Хэлтсийн дарга, 2010-2011 онд “Идеал групп” ХХК-д захирал, 2011-2015 онд “Хот төлөвлөлтийн хүрээлэн” ХХК-д ерөнхий захирал, 2015-2016 онд Барилга, хот байгуулалтын яаманд Газрын дарга, 2016 онд “Хот төлөвлөлтийн хүрээлэн” ХХК-д ерөнхий захирал, 2016-2017 онд Шадар сайдын орон тооны бус зөвлөх, 2017-2019 онд Барилга, хот байгуулалтын сайдын зөвлөхөөр тус тус ажиллаж байсан. 2019 оноос одоог хүртэл Боловсрол, соёл, шинжлэх ухаан, спортын яамны харьяа Чингис хааны өв, соёлын хүрээлэнгийн захирлаар ажиллаж байсан юм.
Ийнхүү салбарын нэн чухал асуудал болох хөрөнгө оруулалт, бүтээн байгуулалтын ажлууд буюу театр, чуулга, музей, номын сан, соёлын ордны барилга байгууламжийн асуудлуудад мэргэжлийн үүднээс хариуцан ажиллах шинэхэн Дэд сайд ажлаа хүлээн авчээ.
