“Роснефть” компани долоодугаар сард манай улсад нийлүүлэх шатахууны үнээ нэмсэн тухай бид өмнө нь мэдээлсэн. Тонн АИ-80 бензиний үнэ 41, АИ-92 21, дизель түлш 30 ам.доллараар буюу литр тутамдаа 55 орчим төгрөгөөр нэмэгджээ.
“Петровис” компанийн холбогдох хүнээс энэ талаар тодруулахад “Роснефть” компанийн дотоод бодлогын асуудал учраас бидний зүгээс тайлбар байхгүй” гэв. Тус компанийн хувьд долоодугаар сарын захиалгынхаа 50 хувь гаруйг татан аваад буй бөгөөд одоогоор хуучин үнээрээ хэрэглэгчиддээ үйлчилж байгаа аж.
Газрын тосны газрын холбогдох мэргэжилтэн Б.Онол тоос энэ талаар тодруулахад, “Манай улс энэ сарын шатахуунаа тус улсаас татаж эхэлсэн.
Энэ сарын 17-ны байдлаар улсын хэмжээнд нийт 24 хоногийн шатахууны нөөцтэй байна” гэлээ. Импортлогч компаниуд тус бүрийн санхүүгийн шинжилгээн дээр үндэслэн гаргасан саналаа Засгийн газрын ажлын хэсгээр шийдвэрлүүлдэг ч дээрх алхмыг хараахан хийгээгүй байна. Ямартаа ч импортлогч компаниудын зүгээс үнээ өсгөх талаар тодорхой шийдэлд хүрээгүй байна.
