Мэргэжилтнүүд хүний бие махбодь сөрөг нөлөөтэй тэмцэхийн тулд зарцуулсан үнэт бодисуудыг нөхөх, тамхи татах болон хөндлөнгийн хүний татсан тамхины утааны хорыг багасгах бүтээгдэхүүний жагсаалтыг гаргасан тухай "Men's Life" сэтгүүл мэдээлжээ.
Байцаа. АНУ-ын Экологийн үндэсний хүрээлэнгийн судалгаанаас үзвэл, байцаа нь хорт хавдраас урьдчилан сэргийлэхэд хамгийн сайн нөлөөтэй аж. Энэ ногоонд агуулагддаг изотиоцианат гэдэг бодис нь хорт хавдрын эсийн өсөлтийг зогсоож, тийм эс үржиж олшрохыг зогсоодог байна.
Жирийн цагаан навчит байцаанд ч, хятад байцаанд ч, ялангуяа, брокколид тийм гайхалтай шинж чанар агуулагдсан байдаг ажээ. Ийм гайхамшигтай ногоог байнга хэрэглэвэл уушгины хорт хавдартай болох магадлал 36 хувиар багасдаг байна.
Улаан лоолийн шүүс. Япончуудын үзэж буйгаар, ийм шүүс нь тамхины утаагаар байнга амьсгалдаг уушгинд хамгийн сайн нөлөөтэй аж. Токиогийн Юнтендо их сургуулийн эрдэмтэд хулгана дээр туршилт хийсэн байна.
Улаан лоолийн шүүсэнд агуулагддаг, үл исэлдүүлэгч ликопен гэдэг бодис эд эсэд хор учруулагч молекулууд болох хүчилтөрөгчийн радикалуудыг үүсгэдэггүй ажээ.
Луувангийн шүүс. Бета-каротин нь хүний биед А амин дэмийг үүсгэдэг ба энэ нь салст бүрхэвчийг бэхжүүлдэг байна. Тамхи татдаг хүн хоногт луувангийн хоёр аяга шүүс уух шаардлагатай ажээ.
Улаан буудайн үр. Үүнд ашигтай, идэвхтэй олон бодис, тэдгээрийн дотор Е болон В12 аминдэм, фолийн хүчил нь уушгины эд эсийг хамгаалахад тустай.
С амин дэм. Олон жимс, ногоо ийм амин дэм агуулсан байдаг. Энэ амин дэм бие махбодид үүсдэггүй, зөвхөн гаднаас л хоол хүнсээр авах боломжтой аж. Нөгөө талаар, татсан тамхи бүр бие дэх 35 миллиграмм амин дэмийг устгадаг.
Дашрамд сануулахад, никотин зөвхөн хорт хавдартай болгодог төдийгүй, сайн талтай, жишээ нь, тархийг сэргээж, тухайлбал, ой тогтоолт сайжрах, ажилдаа төвлөрөхөд нөлөөлдгийг Британийн эрдэмтэд саяхан нотолсон байна. Одоо эрдэмтэд Альцгеймер өвчний үед тамхи ямар нөлөө үзүүлдгийг судалж байгаа ажээ.
