Дэлхийн томоохон телевизүүд Лондонгийн олимпод оролцох манай жүдо бөхийн тамирчдыг хэдийнэ судлаад эхэлжээ. Бэлтгэлийн явцаас нь эхлээд алхам бүрийг нь ажиж байгаа аж. Ройтерс агентлагийн сэтгүүлч 2008 оны Бээжингийн олимпийн-100 кг-ийн жингийн аварга Н.Түвшинбаяртай уулзаж ярилцжээ. Тэрээр анх үндэсний бөхөөр хичээллэж байгаад жүдо бөхөөр барилдах болсон тухай болон спортын амьдралыг нь хүртэл яриулаад амжжээ. Н.Түвшинбаяр "2008 оны Бээжингийн олимпийн аваргын амжилтаа бататган алтан медалийн төлөө барилдах болно. Итгэл найдвар байгаа болохоор энд ирсэн" хэмээн мэдэгджээ. Мөн гавьяат тамирчин М.Бундмаагийн өмнөх оролцож байсан тэмцээний амжилтуудыг нь ч бичжээ. Түүнтэй бас ярилцсан байна. М.Бундмаа "Бэлтгэл сайн байгаа болохоор Лондонгийн олимпоос ямар ч байсан медаль хүртэнэ" хэмээн ярьжээ.
Түүнчлэн Афины олимпийн хүрэл мөдальт, дэлхийн аварга Х.Ца-гаанбаатарыг олимпоос медаль хүртэх тамирчдын тоонд оруулан бичсэн байна.
Монголын олимпийн хорооны ерөнхийлөгч Д.Загдсүрэн Монгол Улсад жудо, чөлөөт бөх, байт харваа, буудлагын спорт өндөрт хөгжсөн тул ямартай ч дөрвөн медаль хүртэх зорилго тавиад буйгаа илэрхийлжээ.
Э.БОЛД
