Лондоны олимпийн жүдо бөхийн төрлийн эрэгтэйчүүдийн 73 кг-ийн жингийн тэмцээнд манай улсыг төлөөлөн ОУХМ С.Ням-Очир дөнгөж сая барилдлаа.
Тэрбээр Германы жүдоч Кристофер Воелктэй барилдаж вазари, юко үнэлгээгээр ялалт байгууллаа.
Манай жүдоч өмнө нь Кристофер Воелкийг манай улсад зохиогдсон Дэлхийн цомд ялж байсан юм. Мөн энэ жил Парисын Их дуулгын алтан медалийн төлөө дахин учраа таарч манай жүдоч цэвэр ялж байсан юм.
Харин энэ удаад олимпийн татамид манай бөх дахин ялж Воелкийг ялж сурсан гэдгээ харууллаа. Манай жүдочийн дараагийн өрсөлдөгч нь Португалийн Жоао Пинья, Украины Володимир Сорока нарын ялсан нь байх болно.
2010, 2011 онд Европын АШТ-д түрүүлсэн Пиньятай С.Ням-Очир хоёр барилдаж, ялалтын харьцаа 1-1 байгаа. 2007 онд Гамбургийн супер дэлхийн цомд хожигдож байсан бол 2010 онд Дюссельдорфын гранприд түрүүлэхдээ хагас шигшээд португал жүдочоос даагаа нэхэж чаджээ. Харин Европын АШТ-ий алт, мөнгөн медальт Сорокатай барилдаж үзээгүй.
Н.Өрнө
