Лондоны олимпийн боксын эрэгтэйчүүдийн 49 кг-ийн жинд өрсөлдөж буй Бээжингийн олимпийн аварга, Монгол Улсын гавьяат тамирчин П.Сэрдамба өнөөдөр 21.15 цагт Энэтхэгийн боксчин Дэвендро Лайшрам Сингхтэй тулалдана.
Манай боксчин эхний тойрогтоо гоц мөргөсөн бол Энэтхэгийн тамирчин Гондурасын Молиан Байрон Фигуэроаг ялсан юм. 20 настай Дэвендро Лайшрам Сингх өнгөрсөн онд Бакуд болсон дэлхийн аваргын тэмцээнд дөрөвний нэг шигшээд ялагдал хүлээсэн бол түүний жинд хүч үзсэн П.Сэрдамба хүрэл медаль хүртжээ.
Мөн боксын 64 кг-ийн жинд хүч үзэж буй гавьяат тамирчин У.Мөнх-Эрдэнэ өнөөдөр 21.45 цагт Мавритус Улсын боксчин 25 настай Ричарно Колинтой тулалдах гэж байна. Манай боксчны өрсөлдөгч нь өнгөрсөн онд болсон Бүх Африкийн аварга шалгаруулах тэмцээний алтан медальтан аж. Мөн 2010 онд Лондонд болсон Их Британийн экс колони улсуудын холбооны тэмцээнээс хүрэл медаль хүртжээ.
У.Мөнх-Эрдэнэ Лондоны олимпод эхний тойрогтоо Чехийн боксчин Зденек Члакдекийг 20-12-ын харьцаагаар буулган авсан юм. Тэрбээр 2009 онд Миланд болсон дэлхийн аваргаас хүрэл медаль хүртэж байсан билээ.
