Яруу найргийн "Шинэ үнэр" бүлгэмийн үүсгэн байгуулагч Раднаадоржийн Улам-Оргихын шинэ шүлгийн түүвэр нь уншигчдын хүртээл боллоо.
"Эр хүүрнэл" нэртэй түүний шинэхэн ном нь бодол эргэцүүлэл, чөлөөт эрэлхийллийн шүлгүүдийг багтаасан “Абсурд хүүрнэл”, хайр дурлалын сэдэвт шүлгүүдээс бүтсэн “Сентиментал хүүрнэл” хэмээх хоёр бүлэгтэй юм.
Р.Улам-Оргихын хувьд өдгөө сэтгүүлч болохоор суралцаж байгаа бөгөөд энэхүү түүвэр нь түүний хоёр дахь ном юм. Анх 2010 онд тэрбээр “Миний хашгирсан хавар” нэртэй шүлгийн номоо олны хүртээл болгож байсан билээ.
“Эр хүүрнэл” номд түүний 70 гаруй шилмэл шүлэг багтжээ. Энэхүү бүтээл нь "Шинэ үнэр" бүлгэмийн залуу уран бүтээлчдийн бие даан хэвлүүлж буй 8 дахь ном юм. Уг бүлэг Монголын нэн шинэ үеийн яруу найргийн төлөөлөл болсон Р.Улам-Оргих, Т.Есөн-Эрдэнэ, С.Начин, Д.Сосорбарам, Ө.Үлэмжтөгс, Ч.Өсөхболд, Д.Эрдэнэзулай, Э.Бүжинлхам нарын залуу уран бүтээлчдээс бүрддэг ажээ.
Ингээд яруу найргийн шинэ түүврийн шүлгүүдээс уншигчдадаа дээжилье.
ИЛБЭЧИН
Цаг хугацаа бол илбэчин
гэхдээ тэр жинхэнэ илбэчин.
энэ амьдрал бүхэлдээ
түүний зохиосон илбийн үзүүлбэрүүд.
чадварлаг тэр илбэчин
чамайг ховсдож унтуулаад
зүрх сэтгэлийг чинь
байлдан дагуулсан
нэгэн бүсгүйн дүрээр
зүүд нойронд чинь
нууц ажилтан шиг
нэвтэрч орох болно.
хамгийн нандин бүхнийг чинь
нэг нэгээр нь сэмхэн хулгайлж дуусаад
хар дарсан төгсгөлгүй зүүднээс чинь
хашгирч сэрээх цаг
хугацаа бол илбэчин.
гэхдээ тэр жинхэнэ илбэчин.
ЦАСАН ШИРХЭГ
Цасан ширхэг будрахдаа
уйтгарт дарагдаад унтаж орхисон
урд уулын манант зүүдэнд
унгирал дотроо хөглөрөн сэрчигнэх
улиасны шарангуй навчсын
амь биеийг хучин дулаацуулаарай.
цасан ширхэг будрахдаа
өвөөгийн минь түлээндээ явдаг
үхэр тэрэгний бүдэгхэн жимийг,
өөр ертөнцөд хүрч болох,
амьдрахуйн тэр л бяцхан зөргийг
ариун биеэрээ битгий нууцлаарай.
цасан ширхэг будрахдаа
өвс зуугаад нисэн одсон
тэр нэгэн шувуухайны
өмнөөс үлээх хүйтэн жаврыг
зөөллөн, зөөллөж газардаарай
