Хоёр дахь амьдралаа зохиож, нүсэр хурим хийсэн хийлч Ч.Дэлгэрцэцэг нийгмийн сайн сайхны төлөөх үйлсэд хувь нэмрээ оруулахаар шийджээ. Тэрбээр уран бүтээлийнхээ хажуугаар охид эмэгтэйчүүдэд зөвлөгөө өгч, тодорхой хэмжээгээр туслалцаа үзүүлэх “W” нэртэй клуб нээсэн гэнэ. Хийлч бүсгүйн хувьд, өрх толгойлсон эмэгтэйчүүдийн зовлон жаргалыг ойлгож, сэтгэлийн дэм өгөхийг туйлаас хүсч явдаг учраас ийн зориглосон байна. Энэ тухайгаа тэрбээр “Би олон хүүхэдтэй эхчүүдийн зовлонг дэндүү сайн мэднэ. Багаасаа гэр хороололд амьдарч, түлээ нүүрс болон ус зөөх ажилд нухлагдаж явсан болохоор тэр. Ямар сайндаа ээжийг ажилдаа эзгүй хойгуур эгч маань гэр орноо цэгцлэх, гадуур гарвал намайг үүрч явах гээд л түмэн ажилтай зууралдаж байхав. Тэгээд эгч маань одоо намайг жаахан “цаашлуулдаг” юм. Би чамайг үүрч явсаар байгаад ийм намхан нуруутай болчихсон гээд л баахан инээлддэг” хэмээн дурсчээ. Ч.Дэлгэрцэцэг эмэгтэй хүний дотоод ертөнц бол оньсого мэт тайлагдашгүй, бас маш сонин орон зай гэж тодорхойлдог бөгөөд үүнийгээ ч клубынхээ бодлогод тусган, өөрт нь хандсан эмэгтэйчүүдтэй илэн далангүй харилцдаг гэсэн шүү.
Р.Есүй
