Попын хаан агсан Майкл Жексоны үлэмж хэмжээний эд хөрөнгийг өөрийн болгохын тулд түүний ах, дүү нар цагаандаа гарчээ. Жексон харамсалтайгаар өөд болоод гурван жил өнгөрч байгаа ч түүний өв залгамжлагчид нэг тэрбум доллараар үнэлэгдэж байгаа эд хөрөнгийг нь эвтэй, найртай хуваан авч дөнгөөгүй л байгаа юм.
Эхэндээ тэдний тэмцэл нууц байдалд өрнөж байсан ч өдгөө бүх муу муухай зүйл нь тогооноосоо хальжээ. Ах, дүү нар нь эрээ цээрээ алдаж, нэг нэгнийгээ хэлэх, хэлэхгүй үгээр муулж байгаагийн дээр талуудын өмгөөлөгчид дарин дээр давс нэмж байгаа аж. Хүн бүр л өөрийгөө талийгаачийн хамгийн ойрын, хайртай хүн байсан мэтээр өгүүлж, бусдыгаа доош хийж байгаа гэнэ.
Попын хаан зуурдаар таалал төгссөнөөр түүний ойр дотныхондоо олгодог байсан сайн санааны тусламж нь дуусгавар болсонд ах, дүү нар нь бачуурч сууна. Өдгөө Жексоны хөрөнгө нэгэн итгэлцлийн санд төвлөрсөн бөгөөд энэ мөнгийг түүний хоёр хүү болон нэг охин нь 21 нас хүрээд захиран зарцуулах эрхтэй болох юм.
Энэ санд Жексоны нийт хөрөнгийн 40 хувь нь хадгалагдсан байна. Төдий тооны хөрөнгөө мань хүн ээждээ үлдээжээ. Үүнд нь бачуурсан ах, дүү нар нь байж суух газраа олохгүй байгаа гэнэ. Жексоны ах Рэнди тэднийг төлөөлөн “Талийгаачийн хүүхдүүдийг насанд хүргэхэд 500 мянган доллар л хангалттай шүү дээ” гэж мэдэгджээ.
