Роберт Паттинсон хувийн амьдралаа зарахыг хүссэнгүй

“Харуй бүрий” цуврал кинонд цус сорогч Эдвард Каллины дүрээр од болон гялалзсан Роберт Паттинсон хэдэн долоо хоногийн өмнө найз бүсгүй Кристен Стюарттаа хууртсан тухай мэдээлэл түгсэн билээ. Кристен Стюарт “Цасан цагаан ба анчин” кинон зураг авалтын үеэр найруулагч Руперт Сандерстай үнсэлцэж буй зураг хэвлэлд нийтлэгдснээс хойш Роберт Паттинсон олны нүднээс зугтах болсон юм. Харин хэдэн хоногийн өмнө NBC-гийн “Өглөөний мэнд, Америк орон” нэвтрүүлэгт оролцож, нүүр хагарчээ. Хөтлөгч эр түүнээс хувийн амьдрал, хууртсан тухай нь үг унагахаар олон янзаар үзсэн ч Паттинсон “Би хувийн амьдралаа зарья гэж хэзээ ч хүсч, мөрөөдөж байгаагүй” хэмээн хариулжээ. Харин “Хаана ч явсан таныг хараад тэнхээ мэдэн хашгирах шүтэн бишрэгчдэдээ дасч байна уу?” гэхэд Паттинсон “Ийм зүйлд дасч, дөжирч орхивол галзуурчихсантай ялгаа юу байхав” гэж хэлжээ.