Холливуудын сайхан бүсгүй Америкийн жүжигчин Зой Салдана Америкийн төгөлдөр хуурч, хөгжмийн найруулагч, нийгмийн идэвхтэн, жазз хөгжмийн түүхэнд том хувь нэмэр оруулсан дуучин Нина Симон агсны намтраар бүтээх гэж буй кинонд түүний дүрийг бүтээхээр болсон байна.
Өмнө нь Нина Симоны дүрд Америкийн дуучин, продюссер, жүжигчин Мэри Жей Блайжийг тоглуулахаар төлөвлөж байжээ.
Харин Холливуудын эх сурвалжийн мэдээлснээр Нина Симоны дүрд Зой Салдана тоглохоор болсон гэнэ. Энэхүү киног Нина Симоны 1992 онд өөрөө бичсэн “I Put A Spell On You” хэмээх намтар дээр үндсэлэн бүтээх гэж байгаа юм байна.
Уг кинонд Нина Симон болон түүний туслах Клифтон Хендерсен нарын харилцааны талаар мөн Нина Симоны амьдралийн сүүлийн үеүдэд юу тохиолдсон тухай өгүүлэх аж.
Энэхүү кинонд Клифтон Хендерсений дүрийг Английн жүжигчин Дэвид Оелово бүтээх юм байна.
