Монгол Улсын Засгийн газраас хэрэгжүүлж буй “Сонгодог урлаг II” хөтөлбөрийн хүрээнд энэ жил Римски-Корсаковын “Шахеразада”, Э.Чойдогийн “Шарилжин дундах цэцэг” балетийн бүх хувцсыг шинэчилж, тоглуулахаар болжээ. Өдгөө Дуурь бүжгийн эрдмийн театрынхан бүжгэн жүжгийн хувцсыг шинээр хийж байгаа агаад арванхоёрдугаар сар гэхэд бэлэн болгох төлөвлөгөөтэй. ДБЭТ-ын урын санд хамгийн олон жил болж байгаа бүтээлүүдийн тоонд дээрх бүжгэн жүжгүүд багтдаг юм билээ. “Шахеразада” балетийг 1962, “Шарилжин дундах цэцэг”-ийг 1963 онд Монголын тайзнаа анх тавьсан түүхтэй. 2016 он хүртэл хэрэгжүүлэх “Сонгодог урлаг II” хөтөлбөрийн хүрээнд соёл урлагийн салбарт 11 тэрбум 480 сая төгрөгийн санхүүжилт хийх аж. Сүүлийн жилүүдэд сонгодог урлаг сонирхогчдод зориулан төрийн болон төрийн бус байгууллагын дэмжлэгтэйгээр хэд хэдэн бүжгэн жүжгийн хувцсыг шинэчлээд байгаа юм. “Нойрссон гүнж”-ээр эхэлсэн энэ буухиа ирэх онд ч үргэлжилж, ДБЭТ-ын 50 жилийн ойд барих бэлэг болох биз ээ.
