Ким Кардашиан “Mercedes G63” худалдаж авчээ

Реалити шоуны од, бизнес эрхлэгч эмэгтэй Ким Кардашиан саяхан “Mercedes G63” машин худалдаж авсан тухайгаа “Twitter”-тээ жиргэсэн байна.

Аварга V8 хөдөлгүүртэй энэхүү хүлэг нь 150 мянган ам.долларын үнэтэй бөгөөд ирэх оны загвар аж. Ким Кардашиан тансаг ангиллын машин цуглуулдаг гэхэд хилсдэхгүй. Түүнд 190 мянган ам.долларын үнэтэй “Bentley Continential GT”, 275 мянган ам.долларын “Ferrari 458”, “Range Rover HSE”, 250 мянган ам.долларын “Rolls Royce Ghost”, 300 мянган ам.долларын “Rolls Royce Phantom” бий.

Мөн түүний найз залуу дуучин Кэни Уэст Ким Кардашианд төрсөн өдрөөр нь 400 мянган ам.долларын үнэтэй “Lamborghini” бэлэглэсэн юм. 31 настай сайхан бүсгүйн машинуудыг үерхэж байсан найз залуус нь бэлэглэсэн байдаг.

Ким Кардашиан машинд үнэхээр “нугасгүй” нэгэн. Торонтогийн авто үзэсгэлэнгийн үеэр “Ferrari” компанийн сурталчилгаанд тоглож байв.
Т.Арьяа