Дуурь, бүжгийн эрдмийн театрын гадаа өчигдөр орой хөл хөдөлгөөн ихтэй байлаа. Учир нь энэ л үдэш “ТВ Коктейль” хамтлагийн уран бүтээлчид анхны тайзны бүтээл болох “Хоёр ертөнцийн буудал” сонгодог драмын жүжгийн хаалтаа хийсэн юм.
Арав хоног тайзнаа амилсан сонгодог жүжгийг үзэгчид танхимд дүүрэн үзэн халуун алга ташилтаар өндөрлүүлж байсан билээ. Харин энэ үдэш амжаад үзье гэсэн сонгодогт дурлан татагдсан олны хөлд ийнхүү дарагдсан юм. Сүүлийн үед зөвхөн хошин шогийн тасалбарыг л шагийн үнээр борлуулах мода дэлгэрээд байсан бол энэ удаад сонгдог жүжгийн тасалбар шагаар зарагдаж байсан нь “ТВ Коктейль” хамтлагийн зорилгоо бүрэн биелүүлжээ хэмээн дуу алдахад хүргэсэн шүү. Тэд үзэгчдэд үгүйлэгдэж байгаа энэ л орон зайг нөхөн сонгодог жүжгийг сонгодог орчинд мэдрүүлсэн нь ийнхүү эрэлт ихтэй байлаа. Тэд хүссэнээ хийсэн, үзэгчид сонгдог жүжигт ховсдуулсан. Тиймдээ ч энэ үдэш шагийн үнээр ч болтугай тасалбар авах гэсэн иргэд өөр хоорондоо сураглаж байгаа харагдсан. Харин дотор тоглолтын хонх жингэнэ хэдийнээ тасалбар дууссаныг илтгэсэн ч үзэхээр ирсэн тэд тийм ч дуртай гэрийн зүг харьцгаасангүй. Тоглолтыг зохион байгуулагчид “дахиад тоглоно л доо”, “үзмээр байна аа”, “дахиулъя” гэсэн хүсэлтийг дуу нэгтэйгээр хүргэн “ТВ Коктейль” хамтлагийн жүжигчин, тус жүжгийн менежерээр ажилласан Цоомоогоос “Аль болох дахин тоглох тал дээр ярилцана. Та нартаа хүргэнэ ээ” гэсэн ам өчигийг нь авч байгаа харагдсан шүү.
Гадаа цаг агаар хүйтэрч байгаа ч харин дотор ДБЭТ тайзнаа үхэл, амьдралын зааг дээрх үнэ цэнийг мэдрүүлэн үзэгчдийг ховсдох сонгодог жүжгийн уур амьсгал халуунхан өрнөж байлаа.
