“ТВ Коктейль” хамтлагийнхан саяхан шинэ уран бүтээл болох “Хоёр ертөнцийн буудал” сонгодог драмын жүжгээ 10 хоног үзэгчдийн хүртээл болгон энэ сарын 18-нд хаалтаа хийсэн билээ.
Сүүлийн үед төдийлөн сонгодог жүжиг тайзнаа гараагүй байсан учир үзэгчид энэ төрлийн бүтээлээр цангасан байсан гэж хэлж болно. "Хоёр ертөнцийн буудал" сонгодог драмын жүжиг хаалтаа хийж, жүжгийг үзэж чадаагүй олон хүний сэтгэлийг гонсойлгожээ. Харин энэ удаад ТВ коктейль хамтлагийнхан үзэгчдийн хүсэлтээр шинэ уран бүтээлээ дахин тайзнаа тавихаар болсон сайхан мэдээг дуулгаж байна.
Энэ удаагийн тоглолт тайзаа сэлгэн Улсын драмын эрдмийн театрын тайзнаа 7 хоног тоглохоор болсон тухай баяртай мэдээг “ТВ Коктейль”-ийн жүжигчин Э.Цолмонбаяр бидэнд дуулгасан юм.
Тасалбарын үнэ 15 мянган төгрөг бөгөөд маргаашнаас эхлэн 1950 дугаарт захиалан үнэгүй хүргүүлэх боломжтой ба УДЭТ-ын кассаар тус тус борлуулах юм байна. Долоо хоног тайзнаа дахин амилах сонгодог жүжгээ амжаад үзээрэй.
“ТВ Коктейль”-ийн цоо шинэ, өмнөх бүтээлүүдээсээ тэс өөр жанраар бүтээсэн "Хоёр ертөнцийн буудал" жүжгийг Францын шинэ үеийн шилдэг зохиолчдын нэг Эрик Эммануэль Шмитийн зохиолоос сэдэвлэн бүтээж, эл жүжгийн найруулагчаар Б.Сэнгэдорж ажиллажээ. Жүжгийн гол дүрд Амбий буюу Ц.Батхуяг, Навчаа, тус хамтлагийн Н.Цэнд-Аюуш, А.Өнөржаргал, Э.Цолмонбаяр, Д.Энхбаяр болон Амбий буюу Ц.Батхуяг тогложээ.
