Хүйтний улиралд арьс хуурайших нь ихсэж, эмзэг болох хандлагатай байдаг. Учир нь дулаан уур амьсгал арьсанд хангалттай чийг хуримтлуулдаг бол сэрүүнд агаарт чийгшил байдаггүйгээс арьс хуурайших, хагарах нь ихэсдэг аж. Тэгвэл сэрүүнд арьсны чийглэг, булбарай байдлыг хэрхэн хадгалах зөвлөгөөг хүргэе.
Шүршүүрт орох хугацаа-10 минутаас илүүгүй
Жихүүн намар, хүйтэн өвөл гэртээ орж ирмэгцээ халуун шүршүүрт орохоос сайхан юм юу байх билээ. Гэхдээ та дулаацах энэ аргыг эрхэмлэгч бол хугацаа нь 10 минутаас хэтэрч болохгүй. Учир нь халуун ус арьсны чийгшил, биеийн төрөлхийн тослог байдлыг алдагдуулдгаас хүйтний улиралд удаан хугацаагаар усанд орох нь хуурайших, загатнаа үүсгэх хандлагатай байдаг аж. Хэдийгээр усанд орсны дараа биеэ тосолж болох ч энэ нь биеийн өөрийн ялгаруулдаг чийгшил, тосжилтыг бүрэн нөхөж чаддаггүй.
Сүүн шингэн хэрэглээрэй
Нүүрний будгаа арилгахдаа сүүн шингэн болон бусад төрлийн тослог цэвэрлэгч хэрэглэх нь арьсанд илүү чийгшил өгнө. Энэ төрлийн цэвэрлэгч найрлагандаа содын сульфат, наргил модны тос, диметиламинопропиламин тэргүүтэй чийгшүүлэгч бодис агуулдаг.
Чийгшүүлэгч тосыг хангалттай хэмжээгээр түрх
Усанд орсны дараа биеийн тос, чийгшил алдагдах ч зарим хэсгийг нь нөхөхийн тулд чийгшүүлэгч тос хангалттай хэмжээгээр түрхэхийг зөвлөе. Сэрүүний улиралд биеийн лосьон танд хэрэггүй. Учир нь энэ нь чийгшил өгөхгүйгээр барахгүй тослог байдлыг алдагдуулах нь ч бий. Харин биеийн чийгшүүлэгч тосоо хэрэглэхдээ халуун усанд бага зэрэг байлгавал шингэлт нь хурдан хэмээн Америкийн арьс өнгөний эмч Дэвид Банк зөвлөж байна.
Өглөө болон унтахын өмнө
“Шөнө унтаж байх үед биеийн дулаан өөрчлөгдөж байдаг. Тиймээс унтах үедээ ч биеийг чийглэг байлгах хэрэгтэй” хэмээн Дэвид Банк ярьжээ. Өглөө усанд орсны дараа, түүнчлэн унтахын өмнө биеэ чийгшүүлж, тослох хэрэгтэй аж.
Бээлий, оймс ч арьсаа зөөлөн байлгахад тусална
Гарын арьс хэт хуурайшиж сайртах, хөлийн ул хагарах тохиолдолд зориулалтын тос сайтар түрхсэнийхээ дараа хөвөн даавуун бээлий, оймс өмсөж унтах нь нэн тустай.
Омега-3
Зөвхөн гаднах арьс арчилгаа хүйтнийг давж чадахгүй. Та омега-3 агуулагддаг загас, загасан бүтээгдэхүүн, самар тогтмол хэрэглэснээр арьсны хуурайшилтыг багасгаж чадна. Хэрвээ энэ төрлийн хүнс байнга хэрэглэх боломжгүй бол эмийн сангуудад худалдаалдаг Омега-3 бэлдмэлийг хэрэглээрэй.
