Төрийн соёрхолт дуучин Д.Болдын “Үүлэн домог” дууны ая Их Британийн дуучин Жэй Шоны “My own way” цомгийн тэргүүн дуу “Ride it”-ийн эхний хэсгийн аятай тун төстэй гэсэн явган яриа цахим ертөнцөөр тархжээ. Энэхүү ярианд Төрийн соёрхолт дуучин Д.Болд албан ёсоор тайлбар хийгээгүй ч өөрийн твиттерээр “Та нар гүйцэд сонсоод үзээрэй” хэмээсэн байна.
Тэрээр “Үүлэн домог”-ийн ритмийг бөөгийн хэнгэрэгийн чимээнээс “гаргаж” авсан гэдгээ өмнө нь ярилцлагадаа өгүүлж байсан билээ. “Үүлэн домог”-ийн тэрхүү зүрхний цохилт лугаа адил бадрангуй аялгуу монгол бөөгийн хэнгэрэгийн дэлдэлтээс үүдэн гарсан гэдгийг хөгжим гадарладаг бүхэн мэдсэн буй за.
“Монгол поп” бол ая, сэдэв, утга, онол, гармони, хөгжмийн зэмсэг, шүлгийн хэв маяг цогцоороо зөвхөн монголоос төрсөн гэдгийг Д.Болд олонтаа илэрхийлж байгаа. Энэхүү илэрхийлэл түгэх тусам иймэрхүү явган яриа тасрахгүй гарах бололтой. Хэн хөдөлмөрлөж байна, түүнийг хэл ам дайрдаг нь хорвоогийн жам. Гэхдээ монголчууд бид тэрнээс хуулсан гэх биш, харин Жэй Шон монгол бөөгийн хэнгэрэгийн чимээнээс авч ашиглажээ гэж хэлдэг болсон цагт Монгол Улс маань мандан бадрах биз ээ гэх хүн ч байна.
