“Оскар”-ын өмнөх хамгийн том шалгуур гэгддэг “Алтан бөмбөрцөг” гардуулах ёслолын ажиллагаа дуулиантай болж өнгөрлөө. 70 дахь жилдээ зохиогдож буй тус ажиллагааны тэгш ойг мялааж, нэрт жүжигчин Жоди Фостер өөрийгөө лесби гэдгээ тайзан дээрээс зарласан юм.
Лос-Анжелес хотын Беверли Хилтон зочид буудлын ёслолын танхимд “Алтан бөмбөрцөг” гардуулах 70 дахь удаагийн ёслол болсон. Жоди Фостер гэхдээ тайзан дээрээс “Би лесби” гээд шууд хэлчихсэнгүй. “Оскар”-ыг хоёрантаа гардсан жүжигчин “Би ганцаархнаа” гэж яриагаа эхэлсэн байна.
“Би мянга мянган жилийн өмнө бараг чулуун зэвсгийн үед өөрийгөө хэн болохоо зарлачихсан хүн. Тэр үед би турьхан жаахан охин байсан ч гэсэн элгэн садан, найз нөхдийнхөө дунд өөрийгөө бүрэн нээж өгсөн. Алдартнуудаас хэвлэлийн бага хурал болгон дээр хувийнхаа амьдралын тухай дуулиантай мэдээлэл хийх болов уу гэж хүмүүс хүлээдэг. Харин би олны өмнө огт хэлж байгаагүй нэг зүйлээ яг одоо хэлмээр байна. Үүнийг хэлэх болсондоо би багагүй сандарч байна. Гэхдээ арай ч бие төлөөлөгч шигээ сандраагүй ээ. Ер нь байгаа зүйлийг байгаагаар нь чанга, бардам хэлчихье. Би гэр бүлгүй хүн. Хэрвээ та бүр хар багаасаа л олны нүдний өмнө байнга явдаг байсан бол шударга, зөв амьдралын төлөө тэмцэхдээ хамгийн гол нь хувийн амьдралаа юунаас ч илүү эрхэмлэх хэрэгтэйг ойлгоно. Миний насан туршийн минь хайр, миний хайрт бүсгүй, үнэнч анд Сидни Бернард байгаагүй бол би энд хэзээ ч зогсохгүй байсан. Орчин үеийн гэр бүлээрээ, хоёр сайхан хүү Чарли, Китээрээ би үргэлж бахархдаг ” гэж Жоди Фостер хэлсэн юм.
Түүнийг энэхүү үгээ хэлсний дараагаар Кейт Хадсон, Энн Хэтэуэй нар уйлж үзэгдсэн бол танхимд цугласан олон алга нижигнүүлэн ташиж, дэм өгсөн юм. Ийнхүү 50 настай Жоди Фостер “Алтан бөмбөрцөг”-ийн 70 жилийн ойгоор дуулиан тарьж, өөрийнхөө бэлгийн чиг хандлагыг бүгдэд ил болголоо.
Таныг урлагийн тэнгэр ивээг
urlag.mn
