Жонни Деппийн фенүүдэд таатай мэдээ дуулгая. Карибийн тэнгисийн дэггүй дээрэмчин Jack Sparrow эргэн ирэх гэж байна. Тодруулбал, “Уолт Дисней” кино компани “Карибийн тэнгисийн дээрэмчид” киноны тавдугаар ангийг бүтээх болсон тухай албан ёсоор мэдэгджээ. Кино сонирхогчдын хорхойг хүргэм далайн дээрэмчдийн сонирхолтой, адармаатай адал явдлыг өгүүлэх шинэ анги “Tower Heist” буюу “Цамхгийн дээрэм” нэртэй байх гэнэ.
Тус кинотой холбоотой бас нэг дуу алдам мэдээ нь Жонни Депп дахин согтуу ахмадын дүр бүтээснийхээ төлөө 95 сая ам.доллар авах аж. Тэрбээр “Кино багийнхан Жекийн дүрийн төлөө надад 95 саяыг өгөхийг зөвшөөрсөн нь галзуу хэрэг. Хүүхдүүдийнхээ төлөө би дахин Жекийн дүрд тоглох гэж байна” хэмээжээ.
Жонни Депп тус киноны өмнөх дөрвөн ангид гол дүр бүтээж, нийт 350 сая ам.доллар халаасалсан юм.
“Pirates of the Caribbean: Tower Heist” киног ирэх 2015 оны долдугаар сарын 10-нд үзэгчдийн хүртээл болгохоор “Дисней” төлөвлөжээ.
news.mn
