Соёл, спорт, аялал жуулчлалын яамны сайд Ц.Оюунгэрэлийн ивээл дор Монголын орчин үеийн урлагийг дэмжих холбоо, Соёл урлаг хөгжүүлэх сан хамтран “Ертөнцийн гэгээ” эмэгтэй уран бүтээлчдийн үзэсгэлэн 976 галерейд энэ сарын 6-наас эхлэн гарч байгаа билээ..
Үзэсгэлэнд оролцож байгаа Урчуудын эвлэлийн хорооны нэрэмжит шагналт зураач Д.Бадамтай уулзаж уран бүтээлийнх нь талаар хөөрөлдөв.
-Энэ үзэсгэлэнд та ямар бүтээлээр оролцож байна вэ?
-“Хот айл” бүтээлээр оролцож байна. Би монгол зураг зурдаг юм.
-Та Монголдоо болоод өөр улс оронд үзэсгэлэнгээ гаргаж байсан уу?
-Монголдоо таван удаа харин гадаад оронд олон удаа гаргасан. Тухайлбал, ХБНГ, БНЭ, ОХУ, Голланд, Япон зэрэг улс оронд зургийн үзэсгэлэн гаргаж байсан. Гадаадынхан монгол зургийг илүү их сонирхож үздэг. Бас худалдан авдаг юм.
-Таны зураг зурах дуртай улирал?
-Намар бүр л уран бүтээлийн их олз олдог. Намарт их олон өнгө байдаг учир эндээс олон сайхан санаа төрдөг юм. Минийхээр бол уран бүтээлийн санаа олж үйцээ дарах цаг бол намар. Түүнийгээ бодож бясалгаад л өвөлдөө гэртээ суугаад зурж гарна даа. Ер нь бүтээлийн эрэл хайгуул зогсолтгүй хийнэ .
-Таны хамгийн их сэтгэл хөдөлсөн агшин?
-1989 онд хэсэг уран бүтээлчид Өмнөговь аймгаар аялсан юм. Тэр нутгийн байгалийн үзэмжийг гайхан биширч ёстой л нүд нээгдсэн. Энэ бол мартагдашгүй хором байлаа.
-Яагаад зураач болохоор шийдэв?
-Энэ бол надад цаанаасаа заяагдсан үйл юм. Дунд ангид байхдаа зураг зурах гэж шимтэн бүр нойргүй хонодог байлаа. Миний амьдралын учир утга юм даа.
-Таны бүтээлийн онцлог юу вэ?
-Монгол зурагийг зөвхөн монгол хүн л зурна. Тиймээс дэлхийд гайхуулах урлаг. Би бол монгол зурагг уран зургийн хэллэг оруулж зурдаг. Үүгээрээ бусдаас ялгаатай.
-Монгол зураг зурдаг зураач олон уу?
-Монголд зураач их олон. Гэхдээ монгол зураг зурдаг зураач бол гарын 10 хуруунд багтана. Монгол зураг дэлхийд гайхагддаг урлаг болоод байна. Миний зурсан зургийг гадаадын иргэд худалдан авдаг.
-Худалдана гэхээс бүтээл бүхэн давтагдахгүй учир танд хайран санагдахгүй юу?
-Би ганцхан “Өвөг дээдэс” нэртэй зураг зарсандаа одоо ч харамсдаг. Тухайн үед бүтээлээ авч үлдэх ямар ч боломжгүй байсан юм. Хийсэн бүтээлээ борлуулж л бид амьдарч байна бас дараагийн бүтээл хийх материалаа ч авдаг. Заримдаа бүтээлийг маань хамгаалах төрийн бодлого байдаг ч болоосой гэж бодоод буруу цагт төрж дээ гэж бодож байсан удаа бий. Гэхдээ хямралын цагаас гараад удаагүй тул мөдхөн сайхан цаг ирнэ гэж итгэж байгаа.
-Уран бүтээлийн удам залгах хүн танайд байна уу?
-Манай бага охин зураач болох гээд сурч байна. Мундаг зураач болохгүй юм гэхэд үлдсэн бүтээлийг маань гаргаад хаяхгүй ойлгож бас хамгаалах байх гэж бодож байгаа.
-Уран бүтээл туурвихад цаг их ордог байх даа?
-Эмэгтэй хүнд бол хүндхэн ачаа. Эмэгтэй хүний үүргийг мартах цаг их гарна сайн ханийн буянд уран бүтээлийн замаасаа урваагүй өдий хүрлээ. Улаан нялх хүүхдээ хаяад явна шүү дээ. Нэг бүтээл гаргахад заримдаа ясаа цайтал ширгэж суух удаа ч байна. Ер нь хүнээс их тэвчээр шаарддаг юм. Гэвч зурхад зурахгүй л бол би хэн ч биш болох айдас байдаг. Үнэхээр дурлан байж зургаа зурна.
А.Байгалмаа
