Яадгийм би хүнийг шилж нөхөрлөдөг муу хүн
Яриа сэтгэл нийлээгүй хэнийг ч
Яарч өөрөөсөө түлхдэг хатуу хүн
Яагаад ч нэмэргүй ээ би засрахгүй хүн
Өнгө хөөсөн тэнэгүүдийн нэг би бишээ
Өмссөн зүүсэнтэй нь би нөхөрлөдөггүй
Өндөр зиндаатай андынхаа өлмий доороос
Өлийж өөдөө ширтэх би дургүй
Хөрөнгө харж найзалдаг хөөрхийсийн нэг бишээ
Хэтэвчтэй зузаан мөнгөний хир толбо биш
Халтар цаасаар үзэл санаагаа худалдаж
Хурууны үзүүрээр имрүүлэх би дургүй
Архичин гэсэн гуншинтай байж болноо
Арилсан дотортой л биш бол би нөхөрлөнө
Алдаж эндсэн хүн байж болноо
Ашиг харж над дээр ирээгүй бол би найзлана
Мөнгөгүй ядуу хүн байж болноо
Мөрөөдлөөр баян бол би найзлана
Өнгө мөнгөний нүдээ аничихаад
Өөр өөр түвшний хүмүүстэй нөхөрлөж л явна
Яс цоожтой шоронд бууны хараан доор
Ял эдэлж явсан найз надад байна
Хөглөгөр уулсынхаа энгэр бэлээр налайх
Хонио хариулж яваа малчин найз надад байна
Элсэн шаргал говийнхоо номин тэнгэр доор
Эх орноо манаж зогсоо хилчин найз надад байна
Эзэмшсэн мэргэжлээ төрдөө үнэлүүлж
Эгнэшгүй бат байлгахын төлөө зүтгэж яваа найз надад байна
Тавилангаар учирсан андуудаа
Тоочиж бүгдийг нь хэлсэнгүй
Зарим нэгийг нь сонгож
Заримдагхан амьтан чамд танилцуулсан юм
Дэгжин бүсгүйн нуман хөмсгөн доор
Дэвэрсэн зүрхээ хамтдаа хавчуулаад шаналж явахдаа ч
Дэгдэж сарниагүй андуудтай минь
Дэнжгэрхэн амьтан чи өөрийгөө зүйрлэх хэрэггүй
Элэг эмтрэн хагацал үзэж явахдаа салаагүй
Инээж наргин дуулж явахдаа ч салаагүй
Идэж ууж согтуурч явахдаа ч салаагүй
Ийм андуудтай минь өөрийгөө зүйрлэх хэрэггүй
Холын Америкт хоёр жил болохдоо чи
Хүнийг худалдаж авч сурсан
Халхын нутагт хорин жил амьдрахдаа би
Хэнтэй нөхөрлөхөө ухаарсан
чи л лав биш шүү гэж…
Зарим нэгэн хүмүүст хэлмээр байхын
www.URLAG.mn
