“Надаас хөврөх үнэн хайр, цаг хугацаа” тоглолтынхон хэвлэлийн хурал хийлээ

  Улсын драмын эрдмийн театрын ерөнхий найруулагч Н.Наранбаатар “Надаас хөврөх үнэн хайр, цаг хугацаа” хэмээх нэртэй уран бүтээлийн тайлан тоглолтоо энэ сарын 12-нд 17.00 цагт “UB Palace”-ын их танхимд ганцхан удаа хийх болсон талаараа өнөөдөр "Монгол ньюс" мэдээллийн төвд хэвлэлийн хурлаа хийлээ. Тус хуралд найруулагч Н.Наранбаатар, Төрийн шагналт, Ардын жүжигчин Н.Сувд, УДЭТ-ын найруулагч Ч.Түвшин, УДЭТ-ын жүжигчин МУГЖ У.Уранчимэг, УДЭТ-ын маркетенгийн албаны дарга Т.Дэлгэрбат нар оролцсон юм.

Тэрээр Н.Наранбаатарын хувьд 2000 онд драмын урлаг бараг үзэгчгүй эзгүйрээд байхад 24-хөн насандаа анх “Бооцоо” жүжгийг найруулан шинэ менежмент бий болгож, босго өндөртэй УДЭТ-т хүч түрэн орж ирсэн гэдэг. Түүний жүжиг үнэхээр сайн байсан учраас тухайн үед 1000 төгрөг байсан жүжгийн тасалбарыг 10 мянга болгож чадсан аж. Учир нь тэрээр бүтээлдээ чанарыг онцгойлон Ардын жүжигчин Н.Сувд, Ц.Төмөрбаатар, Ц.Төмөрхуяг гээд тухайн үедээ л ойрд тайз дэлгэцээр гараагүй уран бүтээлчдээр, мөн үзэгчдийн хүсээд байсан эрэлт хэрэгцээнд тулгуурлан залуу жүжигчдээс Г.Амгаланбаатар, Д.Ганцэцэг нарыг аваад жүжгээ хийсэн нь амжилт дагуулсан. Мөн тэрээр анх удаа жүжиг дуутай, тэр нь өөрөө клиптэй байвал үзэгчдийн сонирхлыг татна хэмээн драмын урлагт шинэ менежментийг хэрэгжүүлсэн нэгэн гээд олон зүйлийн анхдагч юм.

“Бооцоо”-гоор эхэлсэн түүний уран бүтээлийн гараа Соёлын гавьяат зүтгэлтэн Ш.Гүрбазарын алдарт “Надаар тоглосон хайр” жүжгээр үргэлжлэн “Нууц амраг чинь болъё”, “Парисын дарь эхийн сүм”, “Би  ч гэсэн жаргамаар байна”, “Цэцэрлэгт учирсан хоёр”, “Тэнгэрийн хүү”, “Гамлет” зэрэг түүний найруулсан олон шилдэг жүжгүүдийг нэрлэж болно. Мөн “Үл таних эмэгтэй” дэлгэцийн бүтээл нь үзэгчдийг байлдан дагуулсан юм. Түүний тайлан тоглолтод УДЭТ-ын уран бүтээлчид үрэн бүрэлдэхүүнээрээ Төрийн соёрхолт жүжигчин Д.Сосорбарам, “Харанга”-ын Х.Лхагвасүрэн, поп дива Т.Ариунаа, Зууны манлай эстрадын дуучин Б.Сарантуяа, Гавьяат жүжигчин, дуучин Б.Дашдондог, С.Жавхлан, У.Уранчимэг, “Хар сарнай”-н С.Амармандах, хошин урлагийн “Шинэ үе” продакшн, “Мөрөөдлийн театр”, “Дармын дөрвөл”, ”Увертюра”, “Freezone” хамтлаг дуучин С.Сэрчмаа, Л.Ган-Эрдэнэ, Ц.Хулан, Маралжингоо, Г.Эрдэнэтунгалаг, Д.Намсрайноров, BX, Ч.Цэлмүүн, элэглэгч Чапи, Суурь гээд урлагийнхан нэг дор чуулах нь ээ.

Сонирхуулахад тоглолтын тасалбар 25.000 төгрөгөөр худалдаалагдах бөгөөд дэлгэрэнгүй мэдээллийг 50117878, 99198784 утсаар лавлаарай.