Өвөрмонголын алдарт дуучин, Азийн дива хатагтай Урна Цахар Тугчи Улаанбаатар хотноо Монгол ахан дүүстээ зориулан тоглох гэж байна. Түүний “Тэнгэрийн шувуу” тоглолт өнөө оройн 20 цагт Соёлын Төв Өргөөнд болох бөгөөд урилгаар дэлхийд алдартай хөгжимчид Ираны эцэг ,хүү гурав оролцохоор болсон нь гэнэтийн бэлэг болж байна.
Эцэг, хүү гурван хөгжимчин дэлхийн олон оронд очиж хөгжмийн гайхамшгийг мэдрүүлдэг хэдий ч сүүлийн жилүүдэд эцэг хөгжимчин нь тайзнаа тоглоогүй удсан аж. Тиймээс “Тэнгэрийн шувуу тоглолт энэ гурван хөгжимчнийг хамтад тоглуулснаараа онцлог болох гэнэ.
Тоглолтын найруулгыг ХБНГУ-ын дууны инженер Пит хийж байгаа гэдгийг дуучин маань хэвлэлийнхэнд онцолж байна. Дашрамд дуулгахад энэ сарын 30-нд Германы дууны инженер Питтэй туршлага солилцох уулзалтыг “Гёте” институтээс зохион байгуулах юм байна.
Ийнхүү Дуучин Урна Цахар Тугчи СТӨ-ний тайзнаа Өвөрмонголын Ордос ардын дуу болон өөрийн уран бүтээлүүдээ дөрвөн хөгжимчний хамтаар үзэгчдэд толилуулах гэж байна.
Б.Хорлоо
