Уран зураг сонирхогч хүүхэд, багачуудын дунд зарласан “Соёлын өв хүүхдийн нүдээр” уралдааны ялагчид тодорчээ. ЮНЕСКО-гийн Монголын үндэсний комисс байгууллагдсаны 50 жилийн ой болон ЮНЕСКО-гийн Соёлын биет бус өвийг хамгаалах тухай конвенцийн 10 жилийн ойн хүрээнд уралдаан зарласан бөгөөд хот, хөдөөгөөс нийт 85 бүтээл өрсөлджээ. Уралдааны тэргүүн байрыг 40-р сургуулийн хоёрдугаар ангийн сурагч, долоон настай Н.Бадармаа, дэд байрыг 33-р сургуулийн хоёрдугаар ангийн сурагч, найман настай Г.Номинжин, гутгаар байрыг 84-р сургуулийн нэгдүгээр ангийн сурагч, зургаан настай Б.Мөнхнаран тус тус эзэлжээ. Харин тусгай байрт “Амгалан” цогцолборын дөрөвдүгээр ангийн сурагч, есөн Ц.Мөнхжин, нэгдүгээр сургуулийн гуравдугаар ангийн сурагч, найман настай С.Сандалай нар шалгарчээ.
Уралдаанд 6-10 хүртэлх насны багачууд морин хуур хөгжмийн уламжлалт урлаг, монгол ардын уртын дуу, наадам, хөөмэйн урлаг, бүргэдийн баяр буюу шувуучлахуй, Монгол ардын бүжиг-бий биелгээ, Монгол цуур хөгжмийн уламжлалт урлаг, лимбэчдийн уртын дуу хөгжимдөх уламжлалт арга барил-битүү амьсгаа (Лимбэчин) зэрэг сэдвийн хүрээнд бүтээлээ өрсөлдүүлсэн байна. Уралдааны шүүгчээр Монголын урчуудын эвлэлийн хорооны зураач Б.Баярт-Од, Монголын Хүүхдийн ордны уран зургийн багш Г.Батбаяр болон ЮНЕСКО-гийн Монголын үндэсний комиссын Ерөнхий нарийн бичгийн дарга Г.Жаргалсайхан ажиллажээ. Энэхүү “Соёлын өв хүүхдийн нүдээр” уран зургийн уралдаан нь уран зураг сонирхогч хүүхэд багачуудын авьяасыг нээн илрүүлж дэмжих, Монгол Улсаас ЮНЕСКО-д бүртгүүлсэн соёлын биет бус өвүүдийг сурталчлах, түгээн дэлгэрүүлэх, цаашлаад соёлын боловсрол олгоход ач холбогдолтой тухай албаныхан онцолсон юм.
Эх сурвалж: News.mn У.БОЛОР
