Нью-Йоркийн загварын шоуг өөрийн бүтээлээрээ нээж, дэлхий дахинд Монголынхоо загварыг танилцуулсан дизайнер бол Г.Золцэцэг.Тэрбээр Арабын Дубай хотноо ирэх сарын 10-16-нд болох “Fashion me” олон улсын загварын шоунд оролцохоор болжээ.
Дизайнер бүсгүй энэ үеэр ноолуур болон торгоор хийсэн 24 хувцастай хоёр коллекцээ толилуулах юм байна.Мөн түүний загварыг “Киви” хамтлагийнхан тайзнаа амилуулж, уран бүтээлээсээ хүргэх гэнэ.20 гаруй орны дизайнер бүтээлээ танилцуулах тус шоунд нэр хүндтэй 2500 орчим зочин төлөөлөгч очих аж.Г.Золцэцэг “Үзэсгэлэн худалдаа зохион байгуулж, орон орны брэндийг танилцуулдгаараа энэ шоу онцлогтой. Монголын загварыг толилуулахаас гадна урлагийнхантайгаа эх орноо сурталчлах болсондоо баяртай байна” гэлээ.
Дашрамд дуулгахад, тэрбээр энэ зуны сүүлчээр эх орондоо загварын томоохон шоу зохион байгуулж, нэрийн дэлгүүрээ нээхээр төлөвлөөд байгаа гэнэ.
www.URLAG.mn
