Яруу найрагч М.Хүрэлсүх “Буга шүтээн” нэртэй шинэ цомог, яруу найргийн номоо өлгийдөж авчээ.Дээрх хоёр бүтээлийнхээ нээлтийг энэ сарын 24-нд “Интер” номын дэлгүүрт хийх гэнэ. Яруу найрагч М.Хүрэлсүх дууны шүлгээрээ алдартай.
Түүний бичсэн дууны шүлэг хоёр жил дараалан “Морин хуур” наадмын тэргүүн байр хүртсэн юм. Тодруулбал, 2011 оны “Морин хуур” наадамд хөгжмийн зохиолч С.Мөнхбатын аялгуу, яруу найрагч М.Хүрэлсүхийн шүлгээр бүтсэн дуучин Ө.Уянгын дуулсан “Хурмастын дууч шувуу” тэргүүн байрын шагнал хүртэж байсан бол өнгөрсөн жилийн наадамд мөн түүний шүлгээр бүтсэн дуу түрүүлсэн юм.
Монгол Улсын төрийн шагналт, Урлагийн гавьяат зүтгэлтэн Б.Шаравын ая, М.Хүрэлсүхийн шүлэг, ардын жүжигчин А.Долгор, залуу дуучин Л.Солонго нарын дуулж олны хүртээл болгосон “Аминаас үнэтэй Монгол” дуу энэ жилийн “Морин хуур” наадмаас гранпри хүртсэн юм.
Түүнчлэн түүний олонд танигдсан уран бүтээлээс нь нэрлэвэл, хөгжмийн зохиолч урлагийн гавьяат зүтгэлтэн Ч.Сангидоржийн “Өрлөг ижий говь”, “Бүүвэй ээж”, “Сэлэнгэ сайхан нутаг, “Цас бид гурав”, “Төөрөг”, “Энхрий үрс” зэрэг дуунууд болно.
Тэр “Буга шүтээн” хос бүтээлээсээ өмнө “Нармай Монгол” ном, “Зөв совин ивээж байна” цомгоо гаргаж, уран бүтээлийн цэнгүүнээ хийж байсан юм.
www.URLAG.mn