АНУ-ын загварын ертөнцийн нэрт гэрэл зурагчин Бэрт Стөрн Нью-Йоркт өнгөрсөн лхагва гаригт 83 насандаа таалал төгссөн тухай түүний ойрын хүн өчигдөр AFP-д мэдээлжээ.
1929 оны аравдугаар сарын 3-нд Нью-Йоркт мэндэлсэн Бэрт Стөрн 50 жилийн турш гэрэл зурагчнаар ажилласан юм. Тэрбээр Одри Хепбёрн, Элизабет Тайлор, София Лорен, Брижит Бардо гэх мэт дэлхийн хамгийн үзэсгэлэнтэй бүсгүйчүүдийг хальсандаа мөнхөлсөн байна.
Бэрт Стөрн 1962 онд нэрт жүжигчин Мэрилин Монрог нас барахаас 6 долоо хоногийн өмнө түүний гэрэл зургуудыг хальсандаа буулгасан хамгийн азтай гэрэл зурагчин юм. 3 өдөр явагдсан зураг авалтаар 2571 зурагтай болжээ.
Бэрт Стөрн 1982 онд Мэрилин Монрогийн зургуудаас бүтсэн “The last sitting” хэмээх 188 хуудастай, гэрэл зургийн номоо гаргасан юм. Тэрбээр амьдралынхаа сүүлийн жилүүдийг дэлхийн хамгийн нэр хүндтэй Нью-Йоркийн орчин цагийн урлагийн музейд ажиллан өнгөрүүлсэн байна.
www.URLAG.mn
