Долдугаар сарын 1-нд дуучин Аврил Лавин сэтгэлт залуу, хөгжимчин Чед Крюгертайгаа хуримласан юм. Сонирхолтой нь Лавин олны жишгийг дагалгүй хар өнгийн даашинз сонгосон байжээ.
Канадын Hello сэтгүүлийн Аврилийн хуримын зургийг хамгаас урьтаж нийтэлсэн нь олны анхаарлыг гойд татсан байна. Тэрээр Monique Lhuillier-ийн хар даашинзаар гоёж, гартаа хар сарнай атгажээ. Чед ч гэсэн хар өнгөөр дагнан гоёжээ. Мөн Канадын үндэсний баярын өдөр тэд хуримаа хийсэн нь Аврилын гаралтай холбоотой юм.
"Хар өнгөөр гоёвол содон сайхан байх болов уу гэж бодсон юм. Канадын баярын өдөр бид хоёрын бас баярыг байнга сануулж байх болно" гэж Крюгер хэлжээ.
"Би хуримаа эртнээс товлож, удаан хугацаанд бэлдсэн. Чед бид хоёр бие биенийхээ хүсэл эрмэлзлэлийг бодож, хоорондоо сайтар ярилцаж хуримдаа бэлдсэн" гэж Аврил Лавин өгүүлсэн байна.
