“Тогоруутай нуур” хэмээх хайрын дууг СТА Б.Болдбаатартай хамтран дуулж анх үзэгч, сонсогчидтой уулзаж байсан МУСТА М.Отгонгэрэл бие даан уран бүтээл туурвих болсноор багагүй хугацаа өнгөрсөн. Тэрээр энэ зун уран бүтээлийн олз омог ихтэй яваа бөгөөд хэдхэн хоногийн өмнө хос цомгоо өлгийдөн авч баяр хөөрөөр дүүрэн байгаа гэнэ.
“Ижийдээ”, “Миний л ижий” нэртэй энэхүү хос цомогт түүний дуулсан ардын болон орчин үеийн нийтийн дуунууд багтаж, эхний цомогт нь түүний олонд хүрсэн мөн шинэ уран бүтээлийн 12 дуу, хоёр дахь цомогт дуулж амьдруулсан 19 дууны дүрстэй клип багтсанаараа онцлог болжээ.
Энэхүү цомогт 20 орчим хөгжмийн зохиолч, яруу найрагч, ая зохиогч гээд олон хүмүүсийн хөлс, хөдөлмөр шингэн ажилласан байна. “Зүрхэн цэцэг”, “Чи минь шүү дээ” гээд түүний дангаараа дуулсан олон сайхан уран бүтээлүүдээс “Эрчүүдээ дуулъя” хэмээх дуу нь монгол эрчүүдийн омогшлыг төрүүлсэн уран бүтээл болсон хэдий ч СТА Г.Эрдэнэтунгалаг булаацалдан дуулж өрсөлдөж яваа. Гэвч дуучин М.Отгонгэрэл энэ бүхэнд шантралгүйгээр уран бүтээлээ туурвисаар байгаагаа энэ удаа өлгийдөн авсан хос цомгоороо харуулж чаджээ
www.URLAG.mn
