Америкийн “BEYOND-5” хөвгүүдийн хамтлаг Азийн найман оронд хийх аялан тоглолтынхоо салхийг манай улсаас эхлэх гэж байна. Тэд өнөөдөр 14.00 цагт UB паласын концертын их танхимд тоглоно.
Энэхүү тоглолтыг Баянгол дүүргийн Засаг даргын тамгын газар, “Дезерет” Олон улсын энэрлийн байгууллага хамтран хөгжлийн бэрхшээлтэй, бага дунд орлоготой өрхийн хүүхдүүд, англи дуу хөгжим сонирхдог залууст зориулан зохион байгуулж байгаа аж.
“BEYOND-5” хамтлагийн таван гишүүнийг АНУ-ын бүх муж болон олон улсаас ирсэн 300 гаруй залуугаас сонгон шалгаруулж авчээ. Хамтлаг байгуулагдаад таван сар болж байгаа юм. Энэ хугацаанд тэд хэд хэдэн сайн үйлсийн аяныг өрнүүлж байжээ. Харин энэ удаа сайн үйлсийн аяны хүрээнд цуглуулсан номоо Баянгол дүүргийн Нийгмийн халамжийн газар хүлээлгэн өгч англи хэл сонирхогч хүүхэд багачуудад хүрэх юм.
Байгуулагдаад удаагүй ч ямагт эерэг үгтэй дуу дуулдаг гэдгээрээ бусдаас ялгардаг “BEYOND-5” хамтлаг урын сандаа чамгүй олон дуутай болжээ. Эдгээр дуугаараа дамжуулан 15-18 насны таван залуу үе тэнгийн Монгол хүүхэд залууст эрч хүч, эерэг энерги өгөхийг зорьж байгаа юм.
www.URLAG.mn
