Монгол хүүхдүүдийн оюуныг 50 жилийн турш тэтгэж, эрдэм номтой, хичээл зүтгэлтэй сайн сурагч болоход уриалсан “Норовын намтар” зохиолоос сэдэвлэн Улсын драмын эрдмийн театрын найруулагч Ч.Түвшин хүүхдийн жүжиг хийхээр болжээ. Тэрбээр Д.Нацагдоржийн нэрэмжит шагналт Д.Содномдоржийн 1957 онд бичсэн найраглалаас сэдэвлэн хоёр жилийн өмнө жүжгийн зохиолоо бичсэн гэнэ.
Соёл, спорт, аялал жуулчлалын яам байгуулагдсаны дараа Сайд газрын дарга нарынхаа хамт УДЭТ-ын ажил байдалтай танилцах үед нь Ч.Түвшин найруулагч мөрөөдлөө тэдэнтэй хуваалцаж, хүүхдийн жүжгээ амилуулах хөрөнгө, мөнгө шаардлагатай байгаа тухай дуулгасан юм билээ. Тэгвэл өдгөө түүний мөрөөдөл биелэх шатан даа ороод байна. Жүжгийн бэлтгэл ажил өдгөө ид өрнөж байгаа ба ирэх есдүгээр сарын 3-нд “Норовын намтар” жүжиг үзэгчдийн хүртээл болно.
Дэвтэр, харандаа, бал, үзгийг гол дүрээ болгодог “Норовын намтар” энэ удаа өргөн бүрэлдэхүүнтэй болжээ. Тодруулбал жүжигт Норовын аав, ээж, ах, дүү, найз нөхдийн дүр нэмэгдэх гэнэ. Монголын анхны үндэсний хүүхдийн жүжиг болон амилах “Норовын намтар”-ын гол дүрд залуу жүжигчин А.Чингүүн тоглох юм.
www.URLAG.mn
