"XX зууны Монголын уран зохиолын үнэлэмж, сургамж” сэдэвт олон улсын эрдэм шинжилгээнии хурал энэ сарын 15-ны 09.00 цагт “Улаанбаатар” зочид буудлын “Хөх асар” танхимд зохион байгуулахаар болжээ.
Монгол улсын түүхэнд онцлох олон чухал үйл явдал тохиосон ХХ зууны үеийн уран зохиолыг тусгайлан судлах шаардлагатай хэмээн манай утга зохиолын эрдэмтэн судлаачид үзэж байгаа аж. Тус хурлыг ШУА-ын Хэл зохиолын хүрээлэн, Монгол судлалын үндэсний зөвлөл, Олон улсын Монгол судлалын холбоо, МУИС-ийн Улаанбаатар сургууль хамтран зохион байгуулах юм.
Хятад, Япон улсуудад ХХ зууны Монголын уран зохиолын талаар томоохон судалгаа хийж, эрдэм шинжилгээний ажил хийгддэг хэрнээ манай улсад судалгаа хийсэн хүн тун цөөхөн байдаг ажээ.
"ХХ зууны үеийн олон зохиолчдыг хар сүүдэр дайран өнгөрсөн бөгөөд энэ үеийн уран зохиолыг судална гэдэг бол зөвхөн үзэл суртал, агуулгынх нь талаас биш тодорхой зохиолчид, хэн хэдийд амьдарч байсан, түүний уран бүтээл ямар байсан, Монголын утга зохиол соёлын хөгжилд хувь нэмрээ оруулсан уу гэдгийг төрөл зүйлээс нь авч үзэх зайлшгүй шаардлагатай байна" хэмээн МУИС-ийн Улаанбаатар сургуулийн захирал, доктор профессор С.Байгальсайхан хэллээ.
Хуралд XX зууны монгол яруу найргийн судлал, XX зууны монгол хүүрнэл зохиол судлал, XX зууны монгол жүжгийн судлал, XX зууны монголын уран зохиолын онолын сэтгэлгээ, судлал шүүмжлэл, харилцаа холбооны асуудал чиглэлээр гадаадын 19, дотоодын 25 эрдэмтэн судлаач илтгэлээ хэлэлцүүлнэ.
www.URLAG.mn
