“Улсын Барилгын Зургийн Төв Институт”-ийн дэргэд барилгын салбарынхны анхны хамтлаг болон байгуулагдсан “Мөнгөн харандаа” хамтлаг 30 жилийн ойн баярын тоглолтоо хийхээр болжээ. Тоглолтонд энэ хамтлагаас төрөн гарсан Зууны манлай дуучин Сарантуяа, дуучин Лхамаа зэрэг олон дуучид оролцох юм байна. Тоглолт энэ сарын 6-нд 18.00 цагаас UB palace-ын концертын их танхимд болно.
Түүнчлэн энэ тоглолтыг Барилга, хот байгуулалтын яам, Барилгын хөгжлийн төв болон мэргэжлийн холбоодтой хамтран баярын арга хэмжээний хүрээнд хийхээр болжээ. Билетийг манай хамтлагийн 88117203 гэсэн утсаар холбоо бариад захиалга өгөх боломжтой аж.
Мөнгөн харандаа хамтлаг нь 1984 оны 09 сарын 06-нд анх байгуулагдсан бөгөөд анхны гишүүд нь хамтлагийн ахлагч даралтат хөгжимчин Т.Түвшинтөр, гоцлол гитарчин Л.Энхбаяр, басс гитарчин Х.Эрдэнэбат, бөмбөрчин Ц.Алтангэрэл, дуучин Ц.Сэлэнгэцэцэг, ритм гитарчин Г.Ганбат нар байжээ. Тус хамтлагийн гишүүд нь “Улсын Барилгын Зургийн Төв Институт”-ийн инженер, техникийн ажилтан албан хаагч нар байсан бөгөөд санаа сэтгэл нэгдэн хамтлаг байгуулсан гэдэг.
“Мөнгөн Харандаа” хэмээн нэрлэсэн нь барилгын зураг төслийн ажил хийхэд хэрэглэгддэг ажлын гол зэвсэг нь харандаа байсан учраас ингэж нэрлэсэн аж. Тэд 80-аад оны сүүлээр зах зээлийн шилжилт эхэлснээр хувийн хамтлаг байгуулах нь илүү ашигтай болсон учраас хамтлагаа тараасан байна.
А.Наран
