“Baby Shark” хүүхдийн дууны зохиогчийн эрхтэй холбоотой нэхэмжлэлийг Өмнөд Солонгосын Дээд шүүх хэрэгсэхгүй болгожээ.
Өмнөд Солонгосын боловсролын “SmartStudy” гарааны компанийн /одоо “Pinkfong Company” нэртэй болсон/ 2015 онд хит болсон “Baby Shark” дуу нь 2011 онд гаргасан дууг нь хуулбарласан гэж Америкийн хөгжмийн зохиолч Жонатан Райт мэдэгдээд байлаа. Гэвч шүүх өчигдөр /2025.08.14/ “Ж.Райтын хувилбар бол эх бүтээл биш” гэж үзээд өмнөх шийдвэрийг хэвээр үлдээжээ.
“Pinkfong”-ийн “Baby Shark” дуу 2015 онд цацагдсаныхаа дараа дэлхий даяар алдартай болж, одоогийн байдлаар “YouTube” дээр 16 тэрбум гаруй хандалт аваад байна. Ж.Райтын хувьд өөрийн хувилбарыг 2011 онд “Pinkfong”-ийн хувилбараас дөрвөн жилийн өмнө гаргаж байжээ.
Эдгээр хоёр дуу Америкийн хүүхдийн зуслангуудад олон жилийн турш дуулагдаж буй уламжлалт аялгуун дээр суурилжээ. Өмнөд Солонгосын шүүхүүд 2021 онд “Pinkfong”-ийг зохиогчийн эрхийг зөрчөөгүй гэж үзэж, 2023 онд шийдвэрээ дахин баталгаажуулсан бол Дээд шүүх хоёр шийдвэрийг хэвээр үлдээжээ.
