Сибирийн мөнх цэвдэгт хадгалагдаж үлдсэн эртний чонын бэлтрэгийн ходоодноос эрдэмтэд устаж алга болсон эртний ноост хирсийн үлдэгдлийг олжээ. 2011 онд Сибирийн зүүн хойд хэсгийн Тумат тосгоны ойролцоо газраас маш сайн хадгалагдаж үлдсэн хоёр сартай эм бэлтрэгийн цогцос олдож байсан юм.
Уг амьтныг 14 400 жилийн өмнө хөрсний нуралтын улмаас үүрэндээ дарагдаж үхсэн гэж судлаачид дүгнэж байжээ. Улмаар бэлтрэгийн ходоодонд байсан хоолны үлдэгдэл мөнх цэвдэгт маш сайн хадгалагдаж үлдсэнийг мөн илрүүлсэн байна.
Эндээс 14 000 орчим жилийн өмнө устаж алга болсон гэгддэг хирсийн махны хэсэг олджээ.
Стокхольмын Их сургууль болон Шведийн Байгалийн Түүхийн музейн хамтран байгуулсан Палеогенетикийн Төвийн судлаач, доктор Камило Чакон-Дюк энэ биологийн материалыг ашиглан эртний хирс ямар амьтан байсныг, яагаад устах болсон шалтгааныг тодорхойлох ховор боломж гарсныг мэдээлэв. Тус багийнхан чонын ходоодноос гарсан махнаас эртний хирсийн геномыг хэрхэн тайлсан тухай ажлын тайлангаа “Genomy Biology and Evolution” сэтгүүлд нийтлүүлжээ. Энэ нь мөстлөгийн үеийн амьтны үлдэгдлийг өөр нэг амьтны ходоодноос олж авсан анхны тохиолдол гэж судлаачид онцолсон байна.
Одоо устах болсон гол шалтгааныг тодруулахаар ажиллаж байгаа гэв.
С.Марта
