“Виртүс” академиас гарамгай уран бүтээлчдийн “Виртуозо гала концерт”-ыг 21 дэх жилдээ зохион байгууллаа. Улсын филармонийн тайзнаа сонгодог, үндэсний, өсвөрийн 17 уран бүтээлч ур чадвар харуулан хөгжимдөж, дуулан, бүжиглэсэн юм. Тус байгууллагаас уламжлал болгосноор тухайн гала концертод сонгогдон, уригдсан уран бүтээлчдээс нэгийг “Виртуоз уран бүтээлч”-ээр өргөмжилсөн нь ардын бүжигчин, Үндэсний урлагийн их театрын гоцлол бүжигчин А.Түвшинбаяр байлаа.
“Виртуозо гала концерт”-ын санаачлагчид тайзнаа тоглосон уран бүтээлчийг дэмжигч үзэгчдээр шагнуулж, урамшуулдаг “дэг” бий болгосноор онцлог юм.
Энэ удаа “Виртуоз уран бүтээлч”-ийн болон өсвөрийн хоёр сонгодог хөгжимчний шагналыг “Мастер тайм” ХХК-иас олголоо. Тухайлбал, “Виртуоз уран бүтээлч”-ээр тодорсон бүжигчин А.Түвшинбаярт олон улсын уралдаанд оролцохоор явах үед нь онгоцны ирэх, очих тийзийг нь нэг удаа авч өгөх аж. Бүжигчинд мөн “Таван нүдэн” брэндийнхэн Чингис хааны дүрсийг товойлгон барласан зангиа гардуулсан юм.
“Мастер тайм” ХХК нь алдарт “Ролекс”-ийн бүтээгдэхүүн, үйлчилгээг эх орондоо нэвтрүүлсэн гэдгээр олонд танил билээ.
