Б.Лхагвасүрэнгийн зохиол “Монгол хаан” жүжгийг ирэх онд Япон Улсад тоглохоор болжээ. “Монгол хаан” жүжгийн баг Японы соёлын тэргүүлэх компаниудын нэг “Tremendous Entertainment” компанитай гэрээ байгуулж, 2025 оны сумогийн Аки башё, Кюшү башё хоёрын дундуур аравдугаар сарын 10-20-нд Токио хотод, аравдугаар сарын 24-26-нд Нагояа хотод жүжгээ тоглохоор болсон байна.
Саяхан тус жүжгийн уран бүтээлчид Японд тоглох бэлтгэл ажлын хүрээнд сурталчилгааны зураг авалтуудаа Фүжи уул, Асакуса зэрэг газруудад хийжээ.
Олон улсын театрын урлагийн мэргэжлийн шүүмжлэгчдээс 4-5 одын үнэлгээ авсан “Монгол хаан” жүжгийн Япон дахь тоглолтын Монгол талын продюсероор Рюүо Э.Санчирболд, Япон талын продюсероор “Tremendous Entertainment” компанийн ерөнхий менежер Масаюүки Сузуки нар ажиллах аж.
Мөн “Монгол хаан” комик номын япон хувилбарыг хэвлүүлж, Японы зах зээлд нэвтрүүлэх ажил эхэлсэн байна.
“Монгол хаан” жүжгийг 2023 онд Лондон хотын “Колизиум” театрт 17 удаа тоглож, 42,000 гаруй үзэгчдэд толилуулсан бол энэ онд Сингапурын “Марина Бэй Сэндс” театрт 22 удаа амжилттай тоглож, 30,000 гаруй үзэгчдэд хүргэсэн юм.
