Холливудын жүжигчин Николас Кейж Малибу дахь гэрийнх нь ойролцоо үүссэн асар том газрын цөмрөлтийн улмаас одоогоор зочид буудалд байрлаж байгаагаа ярьжээ. Тэрбээр нөхцөл байдлаа “Би одоогоор бараг орон гэргүй шахам байна” хэмээн хошигножээ.
Кейжийн Малибу дахь гэрийн ойролцоо есдүгээр сарын 8-нд асар том газрын цөмрөлт үүсэж, байшингийн авто замын хэсгийг нураасан байна. Цөмрөлт ойролцоогоор 7.6 метрийн гүнтэй, 9–18 метр орчим өргөнтэй болж, тухайн бүсийн цорын ганц авто замыг хаажээ.
Үүнтэй холбоотойгоор Малибу хотын захиргаа орон нутгийн хэмжээнд онц байдал зарлаж, ойролцоох 31 айлд нүүлгэн шилжүүлэх мэдэгдэл хүргүүлсэн байна. Аюултай нөхцөл байдлын улмаас долоон байшинг ашиглахыг хориглож, бусад орон сууцны авто замын хүртээмжид ч эрсдэл үүсжээ. Тухайн бүсийн хийн хангамжийг мөн түр зогсоосон байна.
Жүжигчин аравдугаар сард гэрийнхээ орчимд үүссэн эвдрэлийг засварлахтай холбоотой дөрвөн зөвшөөрөл авсан тухай мэдээлжээ. Гэвч засварын ажил хэзээ дуусах, гэртээ хэзээ эргэн очих нь одоогоор тодорхойгүй байна.
