Загвар өмсөгч, бизнес эрхлэгч Хейли Бибер хүүгээ төрүүлсний дараах үед сарын тэмдгийн өмнөх дисфорийн эмгэг (PMDD)-ийн хүнд хэлбэртэй тулгарч байсан тухайгаа ярьжээ. Тэрбээр энэ талаар “Women’s Wear Daily” сэтгүүлд өгсөн ярилцлагадаа хуваалцсан байна.
Хейли Бибер болон дуучин Жастин Бибер нарын хүү Жек Блюз 2024 оны наймдугаар сард мэндэлсэн. Ээж болсныхоо дараах амьдралын өөрчлөлт, бие махбод болон сэтгэл санаанд гарсан өөрчлөлтүүдийн талаар Хейли өмнө нь ч нээлттэй ярьж байсан юм.
PMDD буюу сарын тэмдгийн өмнөх дисфорийн эмгэг нь сарын тэмдгийн мөчлөгтэй холбоотойгоор илэрдэг, сэтгэл санаа болон бие махбодод хүчтэй нөлөөлж болох эмгэг юм. Үүнд сэтгэл санааны огцом өөрчлөлт, цочромтгой болох, түгших, сэтгэл гутрах, ядрах зэрэг шинж тэмдэг илэрч болно. Энэ нь сарын тэмдгийн өмнөх хам шинжээс илүү хүнд хэлбэрээр илэрдгээрээ ялгаатай.
Хейли өмнө нь 2026 оны гуравдугаар сарын 3-нд “SHE MD” подкастад оролцохдоо PMDD-ийн талаар ярьж, өөрт нь хэрхэн нөлөөлж байсныг хуваалцсан юм. Харин энэ удаагийн ярилцлагадаа төрсний дараах үеийн туршлагаа дахин хөндөж, эмэгтэйчүүдийн эрүүл мэндийн асуудлыг илүү нээлттэй ярилцахын чухлыг онцолжээ.
Тэрбээр эмэгтэйчүүдийн эрүүл мэндийн талаарх мэдлэг, мэдээлэл хангалтгүй байгаагаас олон хүн өөрт нь тохиолдож буй шинж тэмдгийг ойлгох, зохих тусламж авахад хүндрэлтэй байдаг асуудлыг хөндсөн байна.
Хейли Биберийн хувьд хувийн туршлагаа олон нийтэд хуваалцаж буй нь эмэгтэйчүүдийн эрүүл мэнд, төрсний дараах өөрчлөлт болон PMDD-ийн талаарх ойлголтыг нэмэгдүүлэхэд чиглэж байгаа юм.
