Өмнөд Солонгосын зохиолч Хан Ган утга зохиолын салбарын Нобелийн шагналыг хүртсэн анхны Солонгос, тэр бүү хэл анхны Ази эмэгтэй гэдгээрээ түүхэнд бичигдлээ. Тэрбээр өчигдөр /2024.12.10/ Шведийн нийслэл Стокхолм хотод Нобелийн шагнал гардуулах ёслолын ажиллагааны үеэр Шведийн хаан XVI Карл Густафаас диплом, Нобелийн шагналаа гардан авчээ. Ийнхүү Хан Ган нь утга зохиолын салбарын 121 дэх Нобелийн шагналтан болж буйгаас гадна 1901 онд гардуулж эхэлснээс хойш энэ шагналыг хүртсэн 18 дахь эмэгтэй болсон юм.
Нобелийн сангийн тэргүүн Астрид Уиддинг энэ оны уран зохиолын шагналт зохиолчийг тодорхойлон хэлэхдээ “Тэрбээр өөрийн бүтээлүүддээ түүхэн учир шалтгаантай цочрол, сэтгэлийн шархыг хөндөж, хүний амьдралын эмзэг нарийн байдлыг гүн гүнзгий судалдаг зохиолч” хэмээн үнэлсэн байна.
