Улсын хүүхэд, залуучуудын театр өнгөрсөн оны дөрөвдүгээр сард Төрийн шагналт, Соёлын гавьяат зүтгэлтэн Д.Батбаярын “Хайрыг хайрла” уянгын драмын жүжгийг Төрийн соёрхолт, Урлагийн гавьяат зүтгэлтэн Н.Наранбаатарын найруулгаар тоглож, хөшгөө нээсэн.
Тэгвэл энэхүү уран бүтээлээ ирэх хоёрдугаар сарын 14-нд 19.00 цагаас буюу гэгээн хайрын баярын өдөрт зориулан дахин ганцхан удаа тоглох гэж байна.
1984 онд Төрийн шагналт, Соёлын гавьяат зүтгэлтэн Д.Батбаяр, найруулагч И.Нямгаваа нар нэгэн “бөмбөг тэсэлсэн” нь “Хайрыг хайрла” жүжиг байлаа. Тухайн үед Улсын хүүхэд, залуучуудын театрын захиалгаар Д.Батбаяр эл жүжгийн зохиолоо бичиж, залуу уран бүтээлчид түүнийг нь амилуулснаар үзэгчдийн хөлд дарагдаж байсан түүх бий.
“Хайрыг хайрла” уянгын драмын жүжигт гэр бүл, хосуудын харилцаа, хайр дурлал, итгэлцлийн талаар өгүүлнэ. Түүнчлэн энэхүү жүжиг нь хором бүрт зөв эргэлт, зөв сонголт хийхийг уриалахаас гадна бүх насныхан үзэх боломжтой. Жүжгийн гол дүрд Д.Оюунтуул, Ч.Авирмэд нар болон Улсын хүүхэд, залуучуудын театрын уран бүтээлчид тоглоно.
