Артист Davaidasha ирэх хоёрдугаар сарын 14-нд буюу Гэгээн хайрын өдрөөр “Шоколад” бие даасан тоглолтоо “UG arena”-д хийхээр болжээ. Тэрбээр энэхүү тоглолтоороо сонсогч, үзэгчдэдээ хайрын илэрхийлэл, халуун дулаан уур амьсгал, мартагдашгүй мөчүүдийг бэлэглэхээр зорьж байгаа бөгөөд эл тоглолтыг “Mongol events”-ийнхэн зохион байгуулж буй аж.
Сонирхуулахад, Davaidasha буюу Г.Ариунболд нь 2017 онд анхны дуугаа студид бичүүлж байсан бөгөөд 2019 оноос “Soundcloud” дээр өдөрт 2-3 дуу оруулдаг болжээ. Харин Davaidasha хэмээх нэрээрээ анх “Хүүхдийн тоглоом” дуугаа цацаж байсан аж. Түүнээс хойш “Чи чинь нээрээ” дуугаа цацсанаар олны анхааралд өртөж, артист 290, Noubold-той хамтарсан “Удаа дараа” уран бүтээл нь түүнийг залуусын сонсох дуртай артист болгосон юм. Тэрбээр 2020 оны арванхоёрдугаар сарын 1-нд “Эстетика” бие даасан цомгоо есөн уран бүтээлтэйгээр гаргасан бөгөөд цомогт багтаагүй 20 гаруй хит синглүүдийг гаргаад буй. Хамгийн сүүлд тэрбээр “Byertai” дууныхаа клипийг сонсогчдод хүргэсэн юм.
