УДБЭТ-ын уран бүтээлчид энэ амралтын өдрүүд буюу хоёрдугаар сарын 22, 23-нд Ж.Вердийн “Травиата” дуурийг толилуулна. Энэ удаа гурван бүлэг, дөрвөн үзэгдэлт эл дуурийн гол дүр буюу Виоллеттад УДБЭТ-ын гоцлол дуучин Г.Энхнаран дуулах юм.
Ж.Верди “Травиата” дуурийн дүрийн танилцуулга
Сонирхуулахад, “Травиата” дуурь нь анх гол баатрынхаа нэрээр буюу “Виолетта” хэмээн нэрлэгддэг байсан бөгөөд 1853 онд Италийн “Ла Фенис” театрт нээлтээ хийж байв. Эл дуурийн цомнолыг Александр Дюмагийн “Камелийн цэцэгт хатагтай” зохиолоос сэдэвлэн Ф.М.Пьяве бичжээ. Ж.Верди, Ф.М.Пьяве нар А.Дюмагийн зохиолын утга, агуулгыг дагаж, орчин үедээ тохируулан хийхийг хүссэн боловч захиалагч болох “Ла Фенис” театраас дуурийн үйл явдлыг өнгөрсөн зуунаар байлгахыг хатуу шаардсан аж. Тиймээс 1880-аад оныг хүртэл уг бүтээл жинхэнэ түүхэн хугацаагаа харуулж чадаагүй байна.
Харин манай театрын тайзнаа “Травиата” дуурт 1977 онд анхлан тавигдсан бөгөөд найруулагчаар нь Урлагийн гавьяат зүтгэлтэн Ё.Цэрэндолгор, удирдаачаар Урлагийн гавьяат зүтгэлтэн Ч.Жамсранжав, ерөнхий зураачаар Ардын зураач Ч.Гунгаасүх нар ажиллаж байв. УДБЭТ-ын уран бүтээлчид 2015 онд БНСУ-ын найруулагч Ан Хо Воныг урьж, уг дуурийг шинэчлэн тавьсан бөгөөд тайз чимэглэлийг Урлагийн гавьяат зүтгэлтэн Г.Ганбаатар, хувцсыг Г.Оюун нар урлан бүтээжээ.
