Н.А.Бестужевын нэрэмжит Оросын улсын драмын театрын уран бүтээлчид манай улсад уран бүтээлээ толилуулах гэж байна.
Тодруулбал, тус театрынхан ирэх дөрөвдүгээр сарын 16-нд 19.00 цагаас “Хайрын одод” хөгжимт жүжгийг УДЭТ-т тоглох юм. Орос хэлээр тоглох эл жүжгийг зохиолыг Сергей Васильев бичиж, найруулжээ. Жүжигтнэгэн хижээл насны эрийн тэртээх Зөвлөлтийн 60-аад онд өнгөрсөн орь залуу насных нь хайр дурлалын тухай дурсамжаар өрнөнө. Туулж өнгөрүүлсэн цэл залуухан он жилүүдийнхээ тухай халуун дулаанаар дурсан санагалзахыг нь жүжигчид амилуулах юм. Тэрбээр эргээд зуны нэгэн өдөр зоогийн газарт харсан бүсгүйдээ халуухнаар дурлаж буй хорин настай залуу болно. Гэвч тэрбээр бүсгүйтэй дотносон ярилцахаас эмээнэ. Түүнийг айж бишүүрхэх хооронд бүсгүй өөрт нь санааширч буй өөр нэгэн залууд сээтгэнэх аж. Тэр хоромд зоогийн газарт цугласан зочид, зөөгчид түүнийг зоримог, шийдэмгий алхам хийхийг дурласан бүсгүйгээс нь илүү их хүснэ.
Хайрын романтик түүхийг өнгөрсөн зууны 60-аад оны чин сэтгэл, хайр, амьдралын утга учир, мөнхийн үнэ цэний тухай өгүүлэх дуу, бүжгүүд тодотгон чимнэ. Харин жүжгийн төгсгөлд гол баатар өнөө цагтаа буцан ирснээр тэр үед тэрбээр зоримог алхам хийж, бүсгүйгээс хайрынхаа хариуд үнэнч хайрыг бэлэг болгон авч, он удаан жилийн туршид хамтдаа аз жаргалтай амьдарсныг харуулах ажээ.
Н.А.Бестужевын нэрэмжит Оросын улсын драмын театрынхан мөн дөрөвдүгээр сарын 17-нд 12.00 цагаас Оросын нэрт хүүхдийн зохиолч Самуил Маршакийн үлгэрээс сэдэвлэсэн “Арван хоёр сар” хөгжимт үлгэрийг Виктор Усовичийн найруулгаар тоглох бол дөрөвдүгээр сарын 17-нд 19.00 цагаас Александ Пушкины “Гилбэрийн хатан” жүжгийг Дмитрий Юмашевын найруулгаар толилуулах юм байна.
