УДЭТ-ын жүжигчин Т.Сэргэлэн Сар шинийн баярын босгон дээр “Алтан гадас” одон хүртлээ. Т.Сэргэлэн СУИС-д Гавьяат жүжигчин Л.Дэмидбаатарын шавь болж, жүжиглэх ур чадварт суралцан, оюутан ахуй хугацаандаа олон ч тэмцээн, уралдаанд өөрийгөө сорьж, театрын уран бүтээлүүдийн олны хэсэгт ажиллаж эхэлжээ.
Тэрбээр Урлагийн нэрт зүтгэлтэн Э.Оюуны “Би эндээс явахгүй” жүжгийн Дорлигт тоглож, түүнээс хойш Ц.Балдоржийн “Хайрын виз”-ийн Жаргалыг тайзнаа дахин “амилуулж”, үргэлжлүүлэн Жон Патрикийн “Опал”-ын Брэтфорд Винтер, Лев Толстойн “Анна Каренина”-гийн Алексей Вронский ч “болсон”. Төдөлгүй У.Шекспирийн “Ромео, Жульетта”-гийн Тибальт, С.Жаргалсайханы “Шөнө дундын бүжиг”-ийн Хавхаар үзэгчидтэй “уулзсан” Т.Сэргэлэн өнгөрсөн оныг Б.Цогнэмэхийн “Тэнгэрийн хүү”-гийн Арваадайгаар тайзнаа амьдарч үдсэн. Тэгвэл тун удахгүй буюу энэ гуравдугаар сарын 5-наас Южин О.Ниллийн “Хайлаас модны доор чамайг хүлээнэ” жүжгийн Эбин Кэботод тоглох юм.
Харин дэлгэцийн уран бүтээлийн хувьд тэрбээр “Замбуулин дуусах болоогүй”, “Тавилан-2”, “Үнэр”, “Халуун зүрх”, Ахан дүүс”, “Чимээ үгүй”, “Золиос” зэрэг уран сайхны болон олон ангит кинонд чадварлаг тоглоод буй.
