Дуучин О.Энх-Эрдэнийн төрсөн өдөр өнөөдөр тохиож байна.
20 насандаа “Авьяаслаг монголчууд” шоуны ялагч болсон О.Энх-Эрдэнэ түүнээс хойш дэлхийн хэмжээний томоохон шоунуудад урилгаар оролцсоор байгаа юм. Хамгийн сүүлд тэрбээр “America’s Got Talent: Fantasy League” шоунд оролцон, шүүгчдийг гайхшруулсан. Мөн Малайз улсын нийслэл Куала Лампур хотод болсон Азийн салбар бүрт амжилттай явж буй шилдгүүдийг тодруулан алдаршуулдаг “The knights award” арга хэмжээнд оролцохоор шалгарч, эл том арга хэмжээний тайзнаа шагнал гардан авсан юм.
Багаасаа гитар тоглож, дуулж эхэлсэн О.Энх-Эрдэнэ өдгөө “New nomads records” лейблтэй хамтран ажилладаг. Тэрбээр 2023 онд “Арван тавны сар”, “Epilogy”, “Зүрхний хайр” зэрэг есөн дуутай “Амьдрал баян” нэртэй цомог гаргасан. “Монгол кантри” төслийн хүрээнд монгол ахуй, соёлыг кантри урсгалаар хэрхэн хүнд хүргэх вэ гэдгийг харуулахаар эл цомгоо гаргаснаа тэрбээр онцолсон байдаг.
