Монгол Улсын Гавьяат тамирчин Г.Өсөхбаяр 20 жилийн дараа дэлхийн дээвэр ноён оргил 8848 метрийн өндөрт оршдог Эверестэд дахин гарсан байна.
Тэрбээр 2025 оны дөрөвдүгээр сарын 21-нд буюу 20 жилийн дараа дахин Эверест ууланд гарахдаа Зууны манлай, Төрийн шагналт, Ардын жүжигчин Ц.Сэвжидийн ач хүү, Хөдөлмөрийн баатар, Төрийн соёрхолт, Урлагийн гавьяат зүтгэлтэн С.Сүхбаатарын хүү, Гавьяат жүжигчин, “Хар сарнай” хамтлагийг үүсгэн байгуулагч ахлагч, өөрийн найз С.С.Амармандахын “Хар сарнай” хамтлагийн 35 жилийн ойд зориулсан тугийг Эверест ууланд мандуулжээ.
Монголын рок поп, хип хопын шилдгийн шилдэг хамтлаг дуучид, хөтлөгч уран бүтээлчдийн оролцох “Хар сарнай” хамтлагийн 35 жилийн ойд зориулсан “Golden hits All stars” тоглолт 2025 оны тавдугаар сарын 24-нд “Socialpay park”-т зохион байгуулагдах гэж байна.
Гавьяат тамирчин Г.Өсөхбаяр анддаа зориулж зүрх сэтгэл, хөлс хүч, урам зоригоо бадраан “Хар сарнай” хамтлагийн тугийг Эверест ууланд мандуулсан талаараа өөрийн цахим хуудсандаа ийн хуваалцсан байна.
