Монголын уран нугараач Б.Одгэрэл “Gentle Monster” болон “Bratz” брэндүүдийн хамтарсан шинэ цуглуулгын рекламд оролцжээ. Тэрбээр уран нугаралтын хөдөлгөөний дэглэлтээр ажилласан бөгөөд түүний уран хөдөлгөөнийг CGI технологиор дамжуулан БНСУ-ын алдарт охидын хамтлаг “Aespa”-гийн гишүүн Каринагийн дүрд шилжүүлсэн байна. Уг төсөл нь “Gentle Monster” брэндийн “Serenity” нэртэй шинэ кампанит ажлын хүрээнд хийгдсэн бөгөөд “Pocket Collection” цуглуулгыг сурталчлах зорилготой байжээ. Тэрбээр “Энэ төсөлд уран нугаралтын уламжлалт хөдөлгөөнийг орчин үеийн дэвшилтэт технологитой хослуулан олон улсад хүргэсэндээ их баяртай байна. Цаашид дэлхийн бусад брэндүүдтэй хамтарч, монгол уран нугаралтыг илүү өргөн хүрээнд сурталчлах хүсэлтэй байна” гэжээ. Б.Одгэрэл сүүлийн жилүүдэд олон улсын брэндүүдтэй хамтран ажиллаж, монгол уран нугаралтыг дэлхийд сурталчлах чиглэлээр идэвхтэй ажиллаж байгаа уран бүтээлч юм.
