Монгол Улсын Ардын жүжигчин, Соёлын элч, дэлхийн хэмжээний баритон дуучин Э.Амартүвшин ирэх есдүгээр сард АНУ-ын Калифорни мужийн Сан Франциско хотын Дуурийн театрын 103 дахь улирлын нээлтийн тоглолтод уригджээ.
Тэрбээр Жузеппе Вердигийн алдарт “Риголетто” дуурийн гол дүрийг бүтээх аж. Риголетто бол Э.Амартүвшинд шинэ дүр биш, харин өмнө нь олон улсын тайзнуудад олонтаа бүтээж, өөрийн гэсэн гайхамшигтай хувилбараа бий болгосон дүр юм.
Мөн өнгөрсөн онд тус театрын тайзнаа “Un Ballo in Maschera” буюу “Маскарад бүжиг” дуурьд анх тоглож, үзэгч, шүүмжлэгчдээс өндөр үнэлгээ авсан байдаг.
Энэ удаа “Риголетто” дуурь есдүгээр сарын 5-наас 27-ны хооронд нийт найман удаа болох бөгөөд 13-ны өдрийн тоглолтыг шууд дамжуулах юм байна. Вердийн “Риголетто” нь дэлхийн дуурийн урлагийн сор бүтээлүүдийн нэг бөгөөд 1851 онд анх Венецийн Ла Фениче театрт тавигдсан цагаасаа эхлэн үзэгчдийн сэтгэлд хоногшсон бүтээл юм.
Монголын сонгодог урлагийн нэрийн хуудас болсон Э.Амартүвшин ийнхүү дэлхийн хамгийн нэр хүндтэй тайзуудын нэгэнд дахин урилгаар дуулж буй нь Монголын урлаг, соёлын томоохон амжилт болж байна.
Сонирхуулахад, Сан Францискогийн Дуурийн театр буюу War Memorial Opera House нь тоглолтод дунджаар 3000 гаруй үзэгч хүлээн авах хүчин чадалтай, АНУ-ын хоёр дахь том дуурийн театр юм.
